عارفين ليه أنا حــ شير في الخير بس ؟!

أنا محمود شاب مصري
من أسرة متوسطة دخلا و دينا
متستغربش ! أيوة , متوسطة دينا .. زي أي أسرة مصرية .. لا أحنا فقهاء في الدين ولا شيوخ منصر
عارفين في دينا فروضه .. و بنفذها كلها الحمد لله

أبي هو يعتبر شيخ الأسرة ,هو شخص متعلم و مثقف .. دائما يرشدنا دينيا
زي أي أب مصري من الجيل الجميل ده

طبعا بما أن الموضوع عن الفتنة فأنا حاحكي حكايتي علي طول

جاري و زميلي في المدرسة و كمان الكلية .. تقدروا تقولوا صديق عمري
أسمه "ميلاد" .. أيوه قبطي !! مفيهاش حاجة خالص

أو أنا كنت فاكر أن مفيهاش حاجة

أحكيلكم شوية عنه بقي
أولا أنا مختارتوش بأرادتي .. عارفين لما تلاقي حد أنت مرتاح ليه أوي و عايزه يبقي صاحبك و خلاص
هي دي طبيعة علاقتي بـ "ميلاد"

تعرفوا أن عمره لا أكل ولا شرب قدامي في رمضان
لدرجة أني أفتكرت أن الأقباط بيصوموا زينا رمضان !!

والدته كانت دايما تطلع لنا في عيد عندهم أسمه عيد الغطاس "بلح" و "جوافة"
و أنا لأني من عشاق الجوافة .. كنت بأكل علي طول من غير مسأل ليه بيأكلوا في اليوم ده جوافة
و تعرفوا لحد دلوقتي معرفش ليه

من فترة قريبة يعني حوالي 6 سنين مثلا أو 7 سنين مش فاكر
دخل النت حياتي و بعدها ب 3 سنين تقريبا أو 4 سنين .. دخل الفيس بوك حياتي
أنا و كتير من صحابي أو بالأحري كتير من جيلي

أصبح حاجة أساسية زي التلفزيون
يوميا تقريبا بدخل علي الفيسبوك بتاعي .. خصوصا أني بلاقي عليه كل حاجة
أخبار .. كورة .. صحابي ,, أخبار الكلية
كل ده في صفحة واحدة سحرية

و في يوم دخلت علي صفحة أسمها "أنصروا الأخت الأسيرة"
عملت"لايك" علي طول
دي أخت ليا و أسيرة و لازم أنصرها

رغم أني معرفش مين عمل الصفحة
ولا أصلا مين الأخت الأسيرة و لا حتي هل هوا كان صادق ولا لأ
بس هوا كل كلامه كان ثوري
و كان بيحفزني أوي
كنت كلي سخط و غضب من بلدي .. زي أي شاب أتربي أن بلده أعظم بلد في العالم
و طلع شاف حقيقة تانية

و بدأ يزيد الكلام و يقولوا أن الأقباط شايلين سلاح في الكنايس عشان يحاربونا
و بيحط أيات قرائنية كانت بتزيدني غضب

و قررت أني أقطع صداقتي ب"ميلاد" لأنه لا يصلح أنه يكون صديقي

طبعا ماوجهتوش بالكلام ده و لكن حاولت أبعد عنه حبة حبة
والدي لاحظ الموضوع و بدأ يسأل ليه ميلاد مبقاش يجيلنا زي زمان

و قلت لوالدي و وريت شوية حاجات علي النت و علي الصفحات أيها !!

والدي أول حاجة قالهالي .. هما دول مصريين !!
أصل شكلهم مش شكل مصريين
و بعدين يا أبني مش هما دول اللي بيضحكوا في وشنا و أحنا نازلين و طالعين
ده حتي سيدنا محمد علي أفضل السلام وصانا عليهم

مش ده ميلاد اللي كان بيساعدك في المزاكرة

في دليل واحد مقنع أنك تصدق الناس دول .. حتي لو كلامهم في جزء من الحقيقة ؟
من أمتي كل الأقباط كانوا كده ؟
أحنا حنعمل زي الغرب اللي بيقولوا كل المسلمين أرهابيين ؟

وحكالي والدي عن عم حنا .. اللي أستشهد في الحرب .. و والدي شاله مشي بيه أتنين كيلو كاملين
عشان ميدختش أسير من الإسرائليين و ﻷنة كان عايز يدفن في بلده

و من ساعتها مبقتش أنشر غير الحاجة اللي أنا متأكد مليون في المية أنها صح
بقيت بنشر قراءات لشيوخ أصواتها جميلة و بقيت بنشر تفسير للقراءن و الأحاديث

و بحاول أني أحمي نفسي و أخواتي و أصحابي من الفتنة

أنا محمود و بنشر في الخير